官司擾身嘅前全國政協委員劉夢熊近排好活躍，泛民舉辦嘅七一遊行佢又高調參加，建制派發起反佔中簽名活動又見佢現身，仲喺傳媒鏡頭下即場簽名博曝光。不過，學民思潮召集人黃之鋒日前就喺《城市論壇》公開質疑佢，話劉夢熊喺攞表簽名前，冇依循反佔中大聯盟嘅規定展示身份證，令人質疑整個簽名行動嘅公信力，搞到大聯盟尋日要急急發稿表明會註銷該份簽名表，以免畀佢拖累。究竟劉夢熊係真心反佔中定係夾埋泛民玩嘢，大家自行判斷喇！
