早前我哋寫過，激進泛民計劃喺來年立法會發動四線拉布戰，包括過往較少出現拉布嘅人事編制小組委員會，當時有消息指人事編制小組來年會由自由黨田北俊（田少）做主席，但原來根據泛民同建制派嘅協調結果，原來人事編制主席來年會落入泛民手中，由會計界梁繼昌（Kenneth）接掌。有人就話由泛民中人做主席，「剪布」時反而會畀建制派易落手，對政府可能有利。
有政界中人分析，若然由田少掌管人事編制小組，實畀社民連梁國雄、人民力量陳志全同新同盟范國威等同樣來自新界東嘅激進泛民玩殘，間接玩死埋政府嘅開位建議，由屬於溫和泛民、並來自功能界別嘅Kenneth做主席，對政府嚟講可能仲好，剪布時可以冇乜政治包袱。Kenneth自言會畀足時間議員發問，但假如有人提出大量無聊、冇意思嘅動議，就算同屬泛民都冇面畀，會照「剪」可也喎。