中環出更：林健鋒金句：一國兩制「史前無例」
身兼行政會議成員嘅立法會議員林健鋒（Jeffrey）尋日又爆金句，而且一爆就打孖嚟，搞到一眾泛民同建制派議員笑到合唔埋口，為沉悶嘅立法會政制事務委員會增添唔少生氣。話說喺大家討論緊香港普選係咪要跟國際標準時，Jeffrey就發表偉論：「咩叫國際標準﹖全世界國家都一國一制，『一國兩制』『史前無例』得中國有，要符合國際標準，係咪要我哋恢復一國一制？」嘩，講到「史前」咁遠，石器時代有冇「一國兩制」，真係要搵啲考古學家考究吓。
到講到提名委員會制度，Jeffrey又要求政改三小組解釋由提委會提名特首普選候選人，係「欽選」定係「競選」？再次引起大家議論紛紛，唔知佢係想講「欽點」、「甄選」，定係將兩者結合再自創一個新詞。委員會主席譚耀宗最後叫大家唔好再嘥時間傾埋呢啲嘢。
長毛放鳥籠 畀麗芸充公
次次講政改都帶埋道具嘅「長毛」梁國雄，尋日又拎咗個真鳥籠放喺自己枱面準備喺發言時使用，但「阿Ann」蔣麗芸就嫌個鳥籠遮住佢視線，擅自走埋去「充公」咗個鳥籠，聲言開完會先畀番長毛。好少咁樣畀人落面法嘅長毛，隨即走向阿Ann搶番鳥籠，然後當場用手打爛埋，原來個鳥籠裏面放咗寫有「普選」字眼嘅字條，寓意要打破鳥籠先有真普選喎。
卓妮