提起飛虎隊，大家都知道係警隊精英，有大件事先至出動。估唔到消防處東施效顰，最近亦喺救護職系成立咗一支「特別支援隊」，聽個名就幾威嘅，可惜畫虎不成反類犬，特別支援隊竟然唔係為咗救死扶傷，而係支援同袍食飯喎，問你服未！
件事係咁嘅。消防處今年四月成立一支由二十四人組成嘅特別支援隊，抽調全港救護站嘅員佐級人員輪流當值，本來嘅目的係一旦發生死傷者眾多嘅大型事故，呢支隊伍可以即時出動，加強救傷扶危能力。好似今年七一遊行同埋早前嘅反新界東北撥款示威等大型活動，特別支援隊都有出動，重要性可想而知。弊在消防官僚亂點鴛鴦，除咗正常出動之外，居然要求佢哋幫手「頂飯更」，畀駐守救護站嘅救護員有時間食飯，你話係咪荒謬吖？
聽吓市民點講吖嗱。「東方報業民意調查」顯示，四成一受訪者批評消防處資源錯配，延遲救援；兩成九認為特別支援隊無法隨時候命，不能加強救傷扶危能力；兩成二指消防處巧立名目，混淆特別支援隊角色。
嗱，好嘅唔靈醜嘅靈，頂飯更終於頂出事嘞。日前南非航空一班抵港航班因為遇到強烈氣流，機上廿多人受傷，本來係消防處特別支援隊大顯身手嘅時機，點知成班隊員正在頂飯更，未能即時出發趕赴機場增援，搞到要抽調其他救護站人手，連原本「被頂更、放緊飯」嘅救護員都要出動。最離譜嘅係，消防處喺接報十幾分鐘後先至陸續調動三輛原本負責新界區嘅特別支援隊車輛到機場，餘下一輛因為一直處理其他召喚，始終無法到機場支援。救人分秒必爭，稍有延誤都會搞出人命，消防處本末倒置，視人命如草芥，難怪連立法會議員都睇唔過眼，質疑消防處究竟食飯緊要定救人緊要！
其實，救護員人手不足已經唔係今日嘅事，佢哋經常忙到連半小時放飯時間都冇，仲點有力氣救人吖。工會一直向消防處爭取放飯鐘，今年初仲走上街頭抗議添，可惜消防處一直闊佬懶理，家陣仲諗縮數，以特別支援隊頂飯更，簡直匪夷所思。公道自在人心，四成六受訪者批評消防處漠視人手不足問題；三成指斥權宜之計，治標不治本；一成九狠批當局敷衍，諗縮數。
冇錯嘞，十個煲七個蓋，始終唔係辦法o架，消防處挖東牆補西牆，擺明敷衍。講真，要解決飯鐘問題唔係好難啫，適當增加人手編制咪一天都光晒囉，消防官僚好做唔做，遲早爆大鑊嘅咋！