港鐵興建中的五項鐵路工程項項延誤，其中高鐵香港段仲要延誤到一七年先可以通車，調查高鐵延誤事件嘅港鐵獨立董事委員會主席馬時亨（肥亨）尋日出席一個電視節目時，就批評港鐵五項鐵路工程一齊動工，加埋政府啲十大基建上馬，令到勞工短缺，結果咪「消化不良」囉！肥亨話，依家睇番轉頭，都覺得港鐵某程度可能太急於求成，做咗錯誤決定，加埋西九總站嘅地質問題、三月嗰場超級黑雨仲浸壞埋部隧道鑽挖機等等預計唔到嘅因素，高鐵唔延誤都幾難喇！
