立法會法律顧問馬耀添（Jimmy）將會喺明年年中退休，行政管理委員會日前召開工作小組會議，討論聘請新法律顧問嘅具體安排。立法會幾乎每次請人都會搵獵頭公司物色人選，但據了解，今次秘書處唔會再好似以前咁搵獵頭公司幫手，而係會先喺大律師公會及律師會刊物或通訊上賣刊登招聘廣告，睇吓有冇資深律師應徵，如果唔得先至再搵獵頭公司。莫非秘書處覺得獵頭公司幫唔到手，所以寧願自行落手落腳登廣告？
有行管會委員透露，秘書處並唔係信唔過獵頭公司，而係因為佢哋收費太貴，事關上次單係搵獵頭公司聘請秘書長，就用咗足足成五十萬元，加上立法會依家要使成二十萬請顧問公司研究立法會大樓保安安排，所以暫時要慳啲唔好咁大使住。隨住政改臨近，Jimmy可唔可以做多一段時間先至退休呢？該行管會委員就話，立法會唔少法律顧問都覬覦Jimmy個位，如果Jimmy堅持延遲退休，佢嘅下屬一定會唔多滿意喎。
其實政改係個燙手山芋，估計未必好多人想接手，加上依家啲議員質素參差，一旦搵咗啲唔夠經驗嘅議員做委員會主席，法律顧問就要好似湊仔咁湊，隨時火燒身都有之。