政情：林新強四宗罪 箍票救亡
香港律師會內部近日立立亂，繼會長林新強（Ambrose）評論一國兩制白皮書後，搞到有會員聯署向佢提出不信任動議，近排連理事之間嘅內部電郵都有人爆埋出嚟。不過，所謂「冰封三尺、非一日之寒」，有知情人士就透露，其實Ambrose早在今年五至六月，已經夾埋犯咗「四宗罪」，所以下月中召開嘅特別會員大會（EGM），究竟佢仲可唔可以「多坐一會」，就真係要睇佢點樣拆招喇！
曾落終院首席法官面子
知情人士透露，「四宗罪」包括律師會五月遞交政改意見書並召開記者會，原本爭議性不大，點知Ambrose當日回答記者提問時，拒絕用英文回應，搞到有英文傳媒當晚暗寸難撈。之後同月中在委任資深大律師（SC）儀式上，Ambrose發言時竟然當面落終審法院首席法官及新任SC面，叫首席法官委任SC前應該諮詢吓社會各界人士意見，搞到好多大律師以至法官都為之側目，事後議論紛紛。
四大律師行授權票關鍵
及至六月中新一屆理事開記招，明明理事會內部討論緊白皮書聲明，Ambrose當日講咗聲明以外嘅嘢，話法官愛國唔影響司法獨立。之後一日佢又上咗電台節目，既話會長發言代表全會，又話共產黨好偉大，夾夾埋埋咪嚟個「總爆發」，有會員聯署向佢提出不信任動議囉！
至於律師會討論不信任動議嘅EGM，會在下月十四日下午假北角青協大樓舉行。對上一次開EGM，原來已經係十年前嘅事，知情人士分析，以往要通過或否決動議，勝負關鍵係「箍實」行內四大律師行嘅授權票（proxy票）。
知情人士又話，以往律師主力搵銀，對畀proxy票冇所謂，但依家人權高漲，特首選舉委員會以至法律界功能界別，一直都係提倡法治獨立嘅大律師勝出，究竟仲肯唔肯畀proxy票頓成疑問。難怪我哋聽聞，本來「坐定粒六」嘅Ambrose，近期都要開始情商一班理事，叫佢哋幫手搵人支持佢。