中環出更：論壇起「鋒芸」 聲疊聲亂龍
港台節目《城市論壇》近來成為示威勝地，繼有示威者企上枱引起大混亂後，昨論壇再爆混亂，今次係台上三位嘉賓大玩聲疊聲。學民思潮召集人黃之鋒指建制派議員蔣麗芸（Ann）參選立法會時都係公民提名，但阿Ann就反駁指自己係「永久性居民」提名，兩者定義唔一樣。但當主持人謝志峰反問阿Ann係咪支持永久性居民提名特首候選人時，阿Ann似乎招架不住。
阿Ann質疑謝志峰點解邀請鄭宇碩及黃之鋒出席論壇：「我哋想講香港前途問題，有個外國人（被指擁有外國護照的鄭宇碩），仲有個唔夠秤嘅小朋友（黃之鋒）喺度，咁點討論呢？你有冇請過泛民議員呢？」謝反駁話：「你咪係立法會議員囉！我今次冇請（泛民）議員！」總之全場拗到面紅耳熱，聲疊聲混亂不堪。
鑑於上次論壇出現混亂，故尋日實施臨時保安措施，大會除咗安排二十幾名便衣保安及制服保安維持場地秩序外，所有入場人士都要登記身份證頭四個號碼，並簽署遵守節目規矩嘅承諾書，而隨身攜帶嘅打火機及萬用刀亦要入場放下暫存。另外，港台正在製造一個約三呎高嘅透明膠板，用作隔開講台及觀眾席，料嚟緊周日可以大派用場。
卓妮