中環出更：油炸鬼 艇仔粥要申遺？
香港地道美食多籮籮，繼「港式奶茶」及「蛋撻」入選香港非物質文化遺產後，仁愛堂前主席兼海皇餐飲集團執董蕭楚基，計劃將民間小食「油炸鬼」與廣東粥品「艇仔粥」申遺，望呢兩款民間特色美食在史上留名。蕭楚基喺上水間粥品店日前開張，一眾善團總理及飲食界好友冒雨撐場，佢就以「油炸鬼」招呼賓客，個個食到舔舔脷。
既然要「油炸鬼」同「艇仔粥」申遺，當然要講吓古仔。蕭楚基話，相傳油炸鬼係諷刺宋代奸臣秦檜，民間於是製作呢款小食來發洩，時至今日，大人細路都食過油炸鬼。至於「艇仔粥」，最初係由廣州水上人家用艇仔喺荔枝灣河經營販賣，雖然艇仔賣粥已絕迹，但風味至今仍在，值得傳承下去。
蕭楚基煲廣東粥拿手
蕭楚基話，會盡快入紙申遺。為打響聲勢，唔排除搞番個「百人齊造油炸鬼」或「千人齊吃艇仔粥」活動都未定喎。講到製作油炸鬼，蕭楚基謙稱唔識，但煲廣東粥就好拿手：「我係潮州人嘛，六、七歲就入廚煲粥畀屋企人食。」數難忘事，就係蕭媽媽經常煲燶粥，為免浪費，全家照吃可也。
將油炸鬼申遺，有份剪綵嘅叙福樓集團執董黃傑龍都話好認同：「呢個係唔少港人嘅集體回憶，不論你係富人定窮人，一定食過油炸鬼。」至於「艇仔粥」，佢認為係體現港人靈活變通、「有乜煮乜」嘅精神。廣東社團總會榮譽主席王國強都來到賀，佢透露九月會重返校園，在理工大學攻讀工商管理博士學位，希望實現兒時夢想。
卓妮