香港人口老化日趨嚴重，政府經常將「老有所養」掛喺口邊，可惜講就天下無敵，做就無能為力。呢，資助院舍宿位長期短缺，僧多粥少，當局唔諗辦法增加供應，反而推行所謂「居家安老」，美其名尊重長者個人意願，實際係推卸責任，將個波踢畀市民後就闊佬懶理，結果居家安老變居家虐老，簡直靠害。
唔係功夫茶亂噏。有團體調查發現，三成八照顧老人家嘅受訪者感到唔同程度嘅抑鬱同焦慮，另外三成三有唔同程度嘅壓力。喺呢啲護老者中，逾五成六係體弱長者嘅配偶，逾七成受訪者係六十歲或以上，且經濟能力欠佳。試諗吓，護老者本身都係年老體衰，又點樣照顧長者吖？所謂居家安老，唔係虐老又係咩吖？
老吾老以及人之老，做仔女嘅侍奉父母，一盡孝道，本來係天經地義，問題係香港地搵食艱難，生活壓力大，好多人為口奔馳已經分身不暇，根本冇能力照顧老人家。你知啦，照顧體弱多病嘅長者其實係沉重嘅負擔，後生仔女都未必頂得順，更何況護老者自己都有番咁上下年紀，要佢哋照顧老伴，想唔壓力爆煲都幾難。
講開又講吖，資助安老院舍不足已經係老大難問題，而且仲愈嚟愈嚴重添。截至今年四月，長者輪候資助護理安老院同護養院嘅平均時間，分別係三十三個月同三十五個月，唔少長者係輪候期間含恨而終，真係聞者心酸。想叫港府增加宿位咩？嘥氣啦，跛腳政府動輒得咎，自身難保，求佢哋不如求自己好過。呢，上個財政年度資助宿位只係增加咗六百個咁大把，相對近三萬輪候大軍，連杯水車薪都不如。
增加本地宿位毫無寸進，當局居然向北望，社署早前宣布向深圳同肇慶院舍買位，咪就係諗縮數囉。咪話功夫茶潑冷水，「北上安老」呢一招根本不切實際，好多長者喺內地無親無故，出起事上嚟隨時叫天不應叫地不聞，加上家陣內地物價愈嚟愈貴，生活指數愈嚟愈高，長者去到內地咯喎，日子唔會好過嘅咋。
即係咁，既然當局無力增加宿位，長者留喺社區內養老，本來不失為冇辦法中嘅辦法，弊在當局既唔夠支援，又唔夠配套，講得難聽啲，即係叫長者自生自滅。冇錯，近年港府喺居家安老方面提出唔少口號同措施，所謂「錢跟人走」、「護老者津貼」、「社區照顧服務券」，係就係幾動聽，可惜姿勢大於實際，與其話係解決問題，不如話係敷衍民意。
一句到尾，長者問題千頭萬緒，小修小補根本無濟於事。港產官僚都有父母，如果仲有些少同情心，唔該快啲制訂長遠全面嘅安老政策啦！