中大校長沈祖堯尋日出席一個德育演講比賽頒獎禮時，忽然自爆對自己喺中三時揀咗讀理科，因而喪失讀中史科嘅機會深感遺憾，惟有老來先打補針學番啲中國歷史。佢又話只要大家多讀歷史，尤其係中國嘅近代史，了解多啲中國嘅輝煌同黑暗面，對民族嘅感情就會油然而生。問及學聯揚言如人大常委會喺八月底否決公民提名，佢哋就會發動全港大專生大罷課，沈祖堯雖然冇直接評論，但係就強調學校一定會如常上課，變相表態唔支持罷課。沈祖堯咁識講嘢，又無喇喇向祖國交心，莫非係另有所圖？
