政情：停牌馬恩國 探親兼寫書
執業大律師馬恩國（Lawrence）去年出席立法會公聽會時，同立法會議員梁國雄（長毛）舌戰，仲以英文「爆粗」，結果上個月中被大律師公會判罰停牌一個月。一個月冇得上庭打官司，Lawrence樂得清閒，於是返咗澳洲悉尼同墨爾本探望屋企人，享受吓天倫之樂，近日仲埋首寫緊一本法律專業相關嘅書籍添。
周五與長毛論壇再相逢
Lawrence寫緊嗰本書係關於公平及信託法嘅法律專業書籍，佢話本書係香港開埠以來第一本講述有關法律嘅書，世界各地嘅法院同大學都用喎，真係夠晒巴閉喇！佢依家如火如荼咁寫緊第三版，預計新書九月就會出爐，前晚佢仲喺寫字樓埋首寫到深夜十一點，幾乎忙過要上庭嘅日子。話時話，本周五佢將同長毛狹路再相逢，出席同一個論壇。唔知到時佢哋會否再擦出火花呢？