政情：胡志偉自爆 搭霸王電車
人稱「叮叮」嘅電車唔經唔覺已行咗一百一十年，滿載唔同年代港人嘅回憶。「六十後」立法會議員胡志偉細個雖然家住九龍，但本身係「皇仁仔」嘅佢每日放學踢完波，都要趕搭叮叮去北角碼頭轉船返屋企。當年每程車費只係幾毫子，唔少典故都提到當年有人為咗慳錢，用超市印花甚至大頭針扮銀仔搭「霸王車」，但志偉話佢另有好橋，要搭霸王車連印花都可以慳番喎！
冇經捲閘企車尾
志偉自爆當年好百厭，試過好幾次跟埋同學仔喺車尾上車後，趁車上面人多而博懵冇穿過捲閘，企咗幾個站後再靜靜雞喺車尾落車，神不知鬼不覺咁搭咗幾趟霸王車。唔知電車公司知道後，會唔會向志偉追收番當年車費呢？講起搭叮叮，志偉又慨嘆，中學時期未試過同隔籬校女仔孖住搭叮叮，反而當選議員後，不時同太太坐吓叮叮拍拖，相信依家佢肯定畀足車錢喇！