政府早前批咗幅市區靚地畀女童軍總會，但女童軍方面遲遲都未動工，浪費社會資源。另一制服團體香港基督少年軍，尋日就投訴政府遲遲未處理佢哋嘅永久會址用地申請，強調基督少年軍歷史比童軍更加悠久，質疑當局大細超。不過佢今次嘅投訴對象，並非負責制服團體事務嘅民政事務局局長曾德成，而係佢大佬立法會主席曾鈺成。
話說曾鈺成尋日出席基督少年軍嘅一個對談活動，期間佢自爆身為大仔，細個時唔係好識得同其他小朋友相處，直至小學五年級參加童軍活動後，至慢慢學識得點樣遷就他人，包括食飯時唔會食晒所有鍾意食嘅嘢，並學識執床同摺衫等，認為小朋友只要參加制服團體，就會發現好多平日睇唔到嘅缺點喎。
曾鈺成一提起童軍點好點正，就激起班基督少年軍把火，即場申訴佢哋嘅歷史仲耐過童軍，但至今喺香港都冇一個永久會址。
基督少年軍總幹事吳淑玲更透露，佢哋早前喺紅磡搵咗幅地可作用興建會址，向民政局提交晒相關申請，但等咗好耐都冇回音，要求曾鈺成代佢哋向佢細佬跟進。曾鈺成今次真係捉蟲喇。