政情：綑綁式議程 逼泛民硬食
立法會大會同財務委員會喺臨近暑假休會死線前「開快車」，先後通過瑪麗醫院重建同雙倍印花稅辣招草案等重要民生撥款同法案，但「三堆一爐」撥款、「低收入在職家庭津貼計劃」（低津）、公務員加薪方案，以及成立創新及科技局嘅決議案同開位建議等，最後仍無法趕及喺休會前表決。據聞政府睇死泛民拉布「虎頭蛇尾」，若果有機會拖垮一啲牽涉大批市民嘅撥款或法案，即使係最激進嘅泛民議員，亦遲早會腳軟自行「剪布」，於是決定將極大機會引發拉布嘅「三堆一爐」撥款，同影響大量基層及公務員家庭嘅低津與加薪方案綑綁，睇吓班拉布議員可以拉得幾耐。
隨着新界東北拉布戰落幕，立法會大會同財委會一度積壓大量議程，原本外界擔心瑪麗重建工程會否被迫延期及超支，辣招草案可能會過唔到而令樓市重現炒風。但到咗休會死線臨近，各黨派議員最後都好識做，紛紛「自剪」停止發言或亂提動議拉布，令廿多項撥款以神速順利通過，包括辣招在內嘅四條政府草案，亦喺有驚無險下大比數通過三讀。
睇死腳軟自剪布
睇番餘下嘅財委會議程，十月復會後首要處理嘅撥款係有關低津計劃嘅開位建議，之後先輪到三堆一爐。不過單純開位並唔足以落實低津，仲要開發相關電腦系統同正式撥款用作支付津貼，呢兩項議程就排咗喺三堆一爐之後，再下一項就係公務員加薪，即係低津、加薪撥款勢受三堆一爐拖累。
雖然不論財委會何時通過加薪撥款，全體公務員都可獲追溯至今年四月一日起加人工，但早啲袋錢總好過遲啲。一眾政府合約工同資助機構員工，更加要等財委會正式通過撥款先有人工加，若果因三堆一爐拉布而延遲加薪，怨氣咪話唔深。加埋受惠於低津嘅基層市民有數十萬，受影響人數仲多過住喺三個堆填區附近嘅居民，班議員有數得計，遲早會向選票屈服。
至於創科局決議案同開位撥款，據悉暫時仍排喺最後，但現時仲喺工務小組同事務委員會輪候緊嘅其他民生撥款，例如佛教醫院重建工程，好快又會上到財委會排喺創科局之後，到時又再綑綁，議員唔硬食都唔得喇！