政情：中環出更：鄭承隆被「撞車男」當係議員
仁濟醫院前主席鄭承隆（Edwin）繼上月外出食飯無端端跣親拗柴，未完全康復之際又再招來橫禍。Edwin尋日喺社交網站自爆，朝早揸車停經荃灣一個燈位時無故捱撞，佢架七人車即刻凹咗，連泵把都移咗位，但Edwin冇報警之餘仲鬼咁開心，皆因「撞車男」誤認佢係議員，仲威脅佢唔好報警，Edwin無故「升呢」做議員，梗係笑晒啦！
Edwin話，架車被撞後原本準備落車發爛渣，豈料「撞車男」先聲奪人，聲大夾惡話「我認得你呀！你係嗰個『咩咩咩』議員！你唔好報警呀！」Edwin當堂笑咗出嚟，澄清自己唔係議員，就算係『咩咩咩』議員，架車捱撞點解唔可以報警？
事後Edwin同卓妮講，一般遇到呢啲情況都當自己黑仔，唔會追究，加上架車只係作選舉宣傳之用，所以都費事整喇。
稱受損貨車作選舉宣傳用
咦？佢話貨車係用作選舉宣傳，睇嚟Edwin雄心壯志劍指明年區議會喎！話時話，荃灣街坊都誤認Edwin係議員，可見佢喺區內深耕頗有成效，捱呢一撞都算值得喇！
卓妮