政情：中環出更：葉澍堃父子檔書展尋寶
炎炎夏日，好多書迷趁機去會展行書展，買書、歎冷氣消暑一舉兩得。馬會大董葉澍堃（Stephen）同囝囝葉瀚華都唔例外，早幾日下晝四點幾，卓妮見到佢哋兩父子同朋友一齊現身書展，一向識食識玩嘅Stephen好專注睇旅遊書同埋食譜，期間拎住本介紹伊朗嘅旅遊書，睇得好入神，唔通佢諗住去古波斯帝國探秘？
Stephen就話，因為呢排冇咁忙，所以正計劃嚟緊九月全家一齊去歐洲玩，咪入場睇吓有咩好介紹囉！
離官場清閒懶理政事
Stephen係退休高官，卓妮問佢有冇留意近日政府總部「門常開」變咗「門常關」，Stephen就話，睇新聞時有留意到，不過佢對呢方面就冇咩意見，依家離開官場樂得清閒，唔理咁多，得閒去吓旅行仲好喎！至於葉瀚華就專睇教人做運動嘅書籍，最後佢哋三人合共買咗六、七本書，總算冇白行一趟。
去年因為用粗口辱警出晒名嘅爆粗老師林慧思，就食住上出咗本《七月十四，我喺旺角火都嚟》嘅新書，內容除咗講述佢當時用粗口鬧警察嘅風波外，仲談及六四等政治議題，賣書收益將撥捐慈善機構。
林慧思認爆粗或做錯
林慧思承認講粗口可能真係做錯咗，但整體做法大致上冇問題，認為係警察執法不公。佢又呻話，現時依然有人抹黑佢，話佢唔適合教書，但佢認為真金不怕洪爐火，相信邪不能勝正咁話。目前佢已經教番書，仲同其他教師成立「新師潮」團體及擔任顧問，關注教師就業情況及「染紅教育」等。
卓妮