「殺雞焉用牛刀」，呢個道理人人都知，可惜消防處偏偏亂點鴛鴦，大材小用，都唔知好嬲定好笑。
係咁嘅，消防處三個月前煞有介事喺救護職系成立咗一支「特別支援隊」，抽調全港救護站嘅員佐級人員輪流當值，目的係一旦發生死傷者眾多嘅大型事故，呢支隊伍可以即時出動，加強救傷扶危能力。好似今年嘅長洲飄色巡遊、早前嘅反新界東北撥款示威同埋七一遊行等大型活動，特別支援隊都有披甲上陣，重要性不言而喻。
既然咁重要，梗係要時刻保持狀態喇，所以，特別支援隊就算平時唔使出動，一個星期都會進行兩日訓練，而餘下時間就分成兩個小隊，喺青衣及牛頭角救護站戒備。奇就奇在日前正受訓嘅隊員突然接獲上級命令，要求佢哋即時出動前往九龍及新界多個救護站，人人以為有乜大鑊嘢發生喇，去到先至知道上級叫佢哋幫手「頂飯更」，等原本駐守該等救護站嘅救護員有時間食飯喎，問你服未。
消防處要求特別支援隊支援同袍食飯，就好似警務處叫飛虎隊去洗廁所一樣，你話係咪九唔搭八吖？正如救護員工會話齋，當局咁做完全偏離設立特別支援隊嘅原意，根本就係諗縮數，既無助解決救護員人手不足致「冇啖好食」嘅問題，更加係罔顧公眾安全，再咁落去，遲早爆大鑊嘅咋。
嗱，救護員工會嘅擔心唔係杞人憂天o架。尋日南非航空一架飛香港嘅航機遇到氣流，機上二十幾人受傷，本應大顯身手嘅特別支援隊，正正因為要頂飯更而分身不暇，無法出動，消防處最終要調動其他人手到機場支援，你話係咪本末倒置吖？今次就話好彩冇搞出人命啫，下次仲會唔會咁好彩呢？
最好笑嘅係，消防處仲唔肯認衰，聲稱特別支援隊頂飯更嘅安排係善用資源喎。其實，善用資源嘅原意係應慳則慳，應使則使，而唔係亂點鴛鴦。救護員工作愈來愈繁重，去年緊急救護召喚多達七十二萬多宗，救護員話就話有半小時食飯時間，但經常要斷橛禾蟲咁分開食，搞到怨聲載道。工會一直向消防處爭取放飯鐘，今年初仲走上街頭抗議添，點知消防處唔係闊佬懶理，就係諗縮數，卒之搞出特別支援隊頂飯更嘅笑話。
所謂事在人為，要解決救護員飯鐘問題好易啫，正如立法會議員話齋，應該直接增加人手編制，而唔係一味挖東牆補西牆。試諗吓，救護員自己都冇啖好食，仲邊有能力救急扶傷吖？講到底，救人分秒必爭，消防處一味諗縮數，即係攞人命較飛啫！