教育局局長吳得掂到一間中學勉勵文憑試考生，咁啱中學文憑試放榜前剛好是世界盃決賽，佢以德國奪冠勉勵考生，就地取材本來無可厚非，可惜佢九唔搭八，引喻失義，被人窒到飛起。
吳得掂係咁講：「不知道德國是否大家支持嘅冠軍球隊，由初賽、十六強、以至決賽；每一場比賽都像人生的經歷一樣……過往六屆都很努力，今次再一次拿到冠軍，就是努力裝備自己、增值自己、改善自己，在不同的崗位，都可以參加比賽。」其實，打得入決賽嘅，有邊隊唔努力裝備自己、增值自己、改善自己？邊個唔想成為最有價值球員？可惜美斯平時斬瓜切菜應入而不入的波，告訴大家「波係圓嘅」，再說，世界勁旅嘅巴西，竟在四強輸到如蛤蟆跳門檻──不碰鼻子就碰臉，難看死了！可見德國奪冠並非單靠「努力裝備自己」，時也、命也，巴西輸成咁，天意弄人？一如吳得掂可以完全不知教育為何物而穩坐教育局局長之位，即使有調查發現；有一半教師對佢嘅工作表現評為０分，認為不合格的更高達百分之九十四！吳得掂一樣「在不同的崗位」，都可以攞到高薪厚祿，此命也，與「增值自己、改善自己」完全大纜扯唔埋！
有網民詰問：強如德國都要二十四年後才能奪冠，試問人生有多少個二十四年？如果吳得掂肯用一個鐘頭上網查吓資料，就知道德國足球，在其主領隊勒夫的帶領下，早已拋棄了德國足球的鐵血精神，放棄身體開始打控球，德國足球變得技術化和細膩化，在勒夫眼裏的世界已變得複雜，批評者若仍懷念簡單過去的「鐵血精神」，無疑Out了！
吳得掂掌教育，顯然未能與時並進，香港近年來教育政策的混吉混亂，吳得掂在不同的崗位，都可以如河魚下海──不知鹹淡，香港教育危矣！