政情：公民講場：男議員齊着短褲 《議事規則》都冇符

立法會主席曾鈺成尋日舉行年結記者會，再次被問及有無辦法處理流會及「拉布」等問題，佢重申如果立法會唔修改《議事規則》，議員就可繼續利用《議事規則》容許嘅條文不斷發言同要求點算開會人數，根本唔可以徹底解決問題。佢又以之前「長毛」梁國雄着短褲入會議廳開會為例，話《議事規則》只係規定議員要着得莊重，但如果有二十個男議員一齊着短褲入去開會，到時根本唔可以單靠《議事規則》解決問題，寄語政府同議員要諗辦法修補行政及立法關係。