政情：八網難逃：反佔中聯盟 暑期工月薪萬蚊
最新成立嘅「保普選反佔中大聯盟」（聯盟）近日開始做嘢，尋日網上流傳一張有關珠海學院學生事務處張貼嘅招聘廣告，以高薪一萬元請學生幫聯盟做暑期兼職，聯絡方法一欄仲寫明叫應徵者聯絡聯盟成員鄭赤琰教授。鄭赤琰係珠海學院嘅客席教授，係咪佢透過學院請人就唔知喇。
廣告「普選」寫錯「普遍」
不過，呢份招聘廣告連聯盟個名都寫錯，竟將「普選」兩字寫錯成「普遍」，真係斷估冇痛苦。
睇番個招聘廣告，雖然話係暑期兼職，但只係返三至四星期，每日返七小時，職責係上門收回預先約定嘅登記資料，估計都係啲輕鬆工作，但大嗱嗱有一萬元報酬，對一個大專生嚟講，都算係一份優差，但係咪打動到啲撐佔中嘅學生，咁就唔知喇。珠海學院發言人話，學生有就業自由，校方唔會干預。其實兼職收集資料唔係咩問題，最怕有學生被賣豬仔排去幫手示威。