中環出更：健身中心結緣 慢必爆新戀情
人民力量陳志全（慢必）兩年前當選立法會議員後正式「出櫃」，公開自己係同性戀者，可惜感情一直未有着落。卓妮日前八到，慢必終於搵到佢嘅「The One」，但就唔肯多講幾句，直到尋日凌晨，先至肯在社交網站公布「戀愛中」，佢黨友「星屑醫生」歐陽英傑等人都即刻恭喜佢，近五百名網民仲畀個「讚（like）」佢添！
慢必甜絲絲話，其伴侶係細佢十年嘅專業人士，兩三個月前相識於健身中心，今次佢依舊採取主動，大家交換電話後，就好似其他情侶咁互發短訊、行街、睇戲、食飯。慢必話，大家都有心理準備會被人知道佢哋嘅新戀情，但係其伴侶嘅家庭始終較為傳統，又驚工作有麻煩，所以講到明唔主動公開合照。
「每一步都係突破」
至於呢個新伴侶係咪「真命天子」？慢必透露，已經帶咗佢見媽咪，但唔想畀壓力對方，形容「每一步都係突破、冒險」。雖然慢必收得咁密實，但其實前晚曾現身立法會接慢必收工，而下月中又會同遊日本九州、鹿兒島，唔知到時會唔會有人撞到佢哋呢？
卓妮