中環出更：書展鬥法 毓民「信徒」蜂擁 葉劉簽名吸客
泛民、建制兩派每逢選舉都要為選票爭崩頭，其實要穩固票源除咗「蛇齋餅糭」，每年出書都係方法之一。書展尋日開鑼，議員葉劉淑儀同黃毓民今年繼續各有新書出版，其中葉太繼續靠教英文吸納學生同師奶支持者，而一向精於「文鬥」嘅毓民亦將過去一年政論結集成書，吸引大批「信徒」排長龍搶購，雙方各有粉絲唔使爭。
葉太尋日下午低調現身新書簽名會，唔少行經嘅市民抬頭一望見到葉太賣書都好驚喜，湊熱鬧嘅人當中更不乏求知若渴嘅學生及其家長，唔少家長驚見葉太親身上陣，都即刻買番幾本畀葉太簽名，葉太更唔錫身主動俯身書堆同書迷合照，唔怪得銷量都算唔錯。葉太坦言，英文教學書銷量點都唔及愛情小品、o靚模寫真、鬧政府等呢類「激情啲」嘅書籍咁受歡迎，但佢出書唔係旨在賺錢，可以幫到學生學英文一樣好滿足。
張漢賢到內地書攤踩場
另一邊廂，幾乎年年都有新作嘅毓民尋日亦落場簽書兼同支持者會面，大批毓民嘅死忠粉絲一見偶像現身，即刻買書兼乖乖哋排隊等簽名，似乎「激情啲」嘅書真係幾好賣。
有人出書表達政見，亦有人親身去書展表達聲音，「香港人優先」成員張漢賢尋日突然現身某大內地出版社攤位，仲高舉「公民提名」標語，抗議政改諮詢報告暗示否決公民提名。雖然張漢賢喺內地出版社攤位舉標語，但始終書展係香港地方，保安亦未有發現佢嘅行蹤，令張可以喺「簡體字」嘅土地暢所欲言。
至於去年全場「拍烏蠅」嘅政府新聞處，今年依然死性不改，一九九七年出版、慶祝「七一」嘅《邁進新紀元》圖冊繼續當「新出版刊物」以「優惠價」十七元出售，難怪新聞處今年繼續拍烏蠅，新任處長聶德權真係要諗諗計先得！
卓妮