正所謂，一不離二，二不離三。最近公立醫院嘅醫療事故一單接一單，好似傳染病咁不斷擴散，鑊鑊新鮮鑊鑊甘，甚至連一啲原本可以避免嘅低級錯誤都接連發生，問你怕未！
係人都知，過期食物都隨時食壞人喇，何況係過期嘅手術縫合線。嗱，伊利沙伯醫院一名資深手術室護士偏偏犯咗咁低級嘅錯誤，是是但但，求求其其，冇核對清楚就喺手術室使用過期縫合線，導致去年七月至十二月期間，二百三十九名心臟科病人「中招」，事後更有三十三名病人死亡，你話係咪離譜吖。雖然院方聲稱病人死亡同使用過期縫合線無關，但正如專科醫生話齋，使用過期縫合線有機會增加病人感染風險，出現敗血症、心膜炎等併發症。所以話，病人死亡係咪真係同使用過期縫合線無關，實在令人懷疑。
生命冇Take Two，資深護士居然「差不多先生」上身，犯下咁低級嘅錯誤，本來已經罪無可恕，更不可思議嘅係，事發一年後至有人向上級揭發，可想而知公立醫院管理幾咁混亂。正如「東方報業民意調查」顯示，三成五受訪者認為今次事件增加病人風險；三成二批評屬嚴重疏忽；兩成四直指為公院亂象響起警號。
講開又講，公立醫院立立亂，犯錯嘅又點止護士吖，醫生一樣唔好得幾多嘅咋。早前東區醫院新生嬰兒深切治療部一名初生嬰兒接受抗生素西弗士林治療，點知醫生喺電腦處方藥物時居然錯誤輸入多十倍劑量，好彩護士打針時及時發現，用番正確劑量，嬰兒先至避過一劫咋。你話嘞，身為醫生都矇查查，即係攞病人條命較飛啫！
仲有吖，貴為龍頭醫院而且係港大教學醫院嘅瑪麗醫院一樣事故頻頻。一名歲半嬰兒明明入院接受肺囊腫微創手術，結果竟然無厘頭變成開胸大手術，導致嬰兒大量出血，一半腦細胞死亡。醫療事故接二連三，病人唔死一身孱，難怪上述民調顯示，三成九受訪者批評醫療質素下降，病人隨時送命；三成三直斥事故頻生，市民無辜受害；兩成一直指減弱市民對公院信心。
正如古人話齋，月暈而風，礎潤而雨。香港醫療水平曾經傲視亞洲，家陣淪落到失誤頻頻嘅地步，原因何在呢？答案好簡單，醫管局管理混亂，資源分配不均咯。有數得計，醫管局撥款年年增加，從九九年二百六十億元增至去年四百億元，增幅唔小，可惜用於醫護人員嘅開支少之又少，竟然只由二十二億元增至三十二億元咁大把，醫管局一味肥上瘦下，懶理前線人手不足，士氣低落，唔出事至奇喇。嗱，護士協會忍無可忍，計劃周二操上政府總部抗議，當局咪當講笑吖！