政情：術數師批中!議員流年不利
流年運程嘅嘢有時真係講唔埋，現屆政府踏入馬年後全線仆直、家無寧日，認真諸事不順。其實我哋年初都一如往年搵過香港術數家協會術數師楊子東，為香港以至諸位官員、議員批算運程，雖然馬年只過咗約一半，但其中唔少已經「開口中」。好似楊師傅提到上半年「有政府等於冇政府」，事實如此；又提到立法會議員梁國雄（長毛）上半年運程最差，會犯官非「可能好大鑊」；另批蔣麗芸（Ann）及鍾樹根「口舌招尤」亦全中。
梁到九月仍「傷官見官」
楊師傅年頭講過，馬年香港乃「一片火海比劫爭財之局面」，上半年政局處於「有政府等於冇政府」困境，更批算政務司司長林鄭月娥農曆二月及九月大事不吉，剛巧林鄭在二月因為發表政改「一錘定音」言論惹來批評，搞到事後要澄清補鑊。至於議員方面，楊師傅年初批算長毛流年不利，面臨兩大劫數，尤以上半年更差，要小心官非，不諱言「可能好大鑊」，搞搞震冇乜好結果。湊巧長毛因衝擊替補機制論壇而入獄近四星期，更罕有錯過七一遊行。
即使長毛刑滿出獄，但楊師傅批佢捱到九月都依然「傷官見官」，容易惹小人是非、官非，睇嚟長毛真係要謹言慎行，唔係好快又被人剪過一頭「短毛」。
被勸「少講無用嘅說話」
另外，楊師傅亦批算阿Ann同樹根馬年繼續「口舌招尤」。回顧上半年，樹根五月喺立法會會議上，以「鍾式英語」狠批本身係老外嘅港鐵行政總裁韋達誠「尖明（dreaming） on your office（在辦公室發夢）」兼以「I don't think so 囉！」反駁韋達誠解釋。佢事後仲死撐毋須評論呢啲「雞毛鴨蒜」嘅事。
至於Ann就更加唔使講，就算只係坐郵輪遊埠，都可以撞啱「佔領郵輪」風波做「旅霸」；佢其後又喺社交網站質疑「六四」晚會人數報大數，連巴西隊喺世界盃敗陣，佢都要做「鍵盤戰士」抽水。楊師傅年初奉勸阿Ann要特別注意農曆九月會因口舌招尤之事再受攻擊，睇嚟阿Ann真係要聽立法會主席曾鈺成嘅訓話：「少啲講無乜用嘅說話」。講到底，運程嘅嘢都係信則有、不信則無，大家無謂太認真。