中環出更：梁繼昌：貪湯破壞力勁過佔中
「佔領中環」（佔中）提出後，好多團體突然冒起聲稱佔中會癱瘓中環、影響經濟等，但本身係資深「中環人」嘅立法會會計界議員梁繼昌（Kenneth），就話，現時中環作為國際金融中心，最大危機唔係來自佔中，而係核心價值日漸被蠶食，最明顯例子就係「貪湯」前廉政專員湯顯明貪腐行為，已令港廉潔公正形象一鋪清袋。
Kenneth尋日喺電台節目話，雖然港交所設於中環，但現時香港所有金融交易買賣，其實全部靠網上雲端系統操作，就算網路系統有問題，都可以靠衞星電話落盤，而所有同金融有關嘅行業例如會計師樓、律師樓，都可以遙距完成工作，換言之，佔中根本唔會對香港經濟有咩損失。Kenneth認為，佔中第二日後，最多會好似七月二日朝早咁塞吓車，根本阻礙唔到啲人返工。
貪腐更損害港聲譽
Kenneth反而擔心，最損害中環作為國際金融中心形象，係近年香港嘅核心價值慢慢被蠶食，如貪湯做涉嫌貪腐行為，執法部門竟懶理。Kenneth指，金融中心一旦捲入各種貪污腐敗行為，聲譽會嚴重受損，盼市民關注呢方面多啲。
卓妮