大車屢違泊 擋途人視線
「啲大車成日擋住晒，過馬路嗰陣根本睇唔到有冇車剷埋嚟！」在柴灣工作的陳小姐指怡泰街時有車輛違泊，大型車輛更阻擋行人視線，令市民過路時險象環生。陳曾就此向警方投訴，不滿情況一直未見改善，「同警方投訴過好多次，但啲司機仲係當正呢度係泊位！」
警方發言人表示，過往一年曾接獲九十七宗有關涉事路段的違例停泊及交通阻塞報告，並發出約三百三十張定額罰款告票。發言人承諾將加強交通管制行動，以改善交通情況。
促警方加強執法
陳小姐直指問題已持續多年，要求警方履行承諾以杜絕違例停泊，從而保障行人安全，「成百宗投訴同報告，即係每幾日就有人同警方反映，希望佢哋真係會嚴厲啲執法，令到啲司機知道唔可以喺嗰度泊車，唔係等到有人撞車就太遲啦！」