立法會財務委員會前日戲劇性通過由人民力量陳偉業提出嘅中止待續議案，令環境局興建廚餘回收中心嘅如意算盤打唔響，要等十月財委會復會後再嚟過。據聞通過中止待續並非因為建制派唔夠票反對，而係民建聯（民記）唔肯投反對票。有人仲話事發前見到民記陳克勤拉社民連梁國雄（長毛）出會議室密斟，令成件事充滿疑團。
據聞當財委會表決中止待續議案前夕，克勤突然拉咗長毛出去，叫佢唔好要求記名表決，否則該黨惟有投反對票。最後投票時，民記幾個成員坐喺度冇投票，令議案僅以兩票之差獲得通過。雖然環境局局長黃錦星同政治助理區詠芷夜間在立法會調查「死因」，又周圍問民記議員點解唔支持，但始終問唔到真正原因。
聽聞民記對係咪興建廚餘回收中心嘅態度模棱兩可，係因為政府幾年前大力鼓勵業界從事回收工業，正當業界發展漸上軌道，環境局突然之間又話要斥資十五億元興建廚餘回收中心，擺明就係「與民爭利」。所以通過中止待續就令民記唔使表態，更可以時間換取空間，幫業界向政府爭取補償。
克勤回應話，既然廚餘回收中心有爭議，該黨覺得不如再討論吓先作決定。至於佢當時同長毛傾咗啲乜，佢就話唔關廚餘回收中心事喎。唔知民記幾時開始同長毛咁多偈傾呢？唔好話傾立法會足球隊踢波啲嘢呀！