政情：鄉紳鬧政府保育霸權

建議持份者能參與評定

有鄉紳批評，政府空談保育，要業權人用私有產權同政府合作，村民幾乎要「送出嚟」，先至搞到香港保育發展停滯不前。有鄉紳亦都話，依家嘅保育政策就好似郊野公園用地咁︰「漁護署署長行過見幾好就劃一劃，就話係郊野公園地」，直斥「最大嘅地產霸權就係政府！」仲叫審計署研究吓政府喺郊野公園管理方面使過幾多錢，「一個仙都冇，正一霸住廁所唔拉屎！」

班鄉紳講到咁激，新界歷史建築保育係咪冇偈傾呢？有鄉紳話，其實村民並唔介意交出間屋做保育嘅，之不過到時「今年整嗰樣，出年整嗰樣，後年又整嗰樣」，村民點負擔得起呢？所以最好嘅方法就係政府安排覓地重置，喺附近安排受影響嘅村民上樓，又或畀佢哋喺自己嘅農地免補地價起番間屋，兼且政府負擔埋建築費同置換補償，咁咪皆大歡喜囉！聽落咁着數，唔怪得有鄉紳直情建議評定新界歷史建築時要有原居民等新界持份者參與啦，到時豈不是輪到佢哋劃邊度做歷史建築物都得？

鄉局六百人訪軍營改期

依家政府只係做諮詢，但班鄉紳已經起晒弶。無他嘅，皆因政府紀錄唔好囉！將啲私人土地納入郊野公園範圍，莫講話起樓，種棵植物都唔得，睇嚟發展局局長陳茂波真係要同鄉議局主席劉皇發多啲「咬耳仔」密斟拆掂佢先得喇！另外，鄉議局原本打算組織約六百人嘅代表團喺月底探訪石崗軍營及慰問駐港部隊，但佢哋前晚就收到通知，話部隊事務繁忙，有特別安排，叫佢哋改期喎。