政情：中環出更：吳克儉探望病妻 副局代開會
教育局局長吳克儉（吳得掂）尋日中午被發現喺沙田威爾斯親王醫院現身，但原來唔係佢有病，而係去探望愛妻。據了解，吳太尋日朝早見唔舒服需急召白車送入急症室治療，令當時身在保良局蔡繼有學校出席結業頒獎典禮嘅吳得掂心急如焚，最後提早一小時離開，趕去醫院探望太太。消息話，吳太今年唔係第一次入醫院，但吳得掂就話唔方便透露太太嘅病情，只係話多謝大家關心。
吳得掂匆匆來去學校結業禮同醫院，下午又要趕去立法會出席財務委員會會議，好彩在午飯時段前已經由教育局副局長楊潤雄代佢出席財委會，咁吳得掂先至可以抽空喺附近食個午飯。點知好衰唔衰，食食吓飯咁啱撞正四個議員，即時被議員質疑佢點解顧住食飯，都唔出席會議。吳得掂急忙解釋，話既然楊潤雄已經代佢出席會議，所以費事中途臨時換人咁話。
吳亮星錯噏楊「建」雄
話時話，楊潤雄都算係立法會嘅常客，但尋日出席財委會時，一度被財委會主席吳亮星叫錯佢做「楊建雄」。唔知係咪因為個會議拖得太耐，搞到吳亮星嘅思路變得混亂呢？
卓妮