港產官僚食嘢唔做嘢，做嘢打爛嘢，早就有口皆悲。呢嗱，好似管理樹木咁簡單嘅事之嘛，自從○八年赤柱發生塌樹奪命意外，當局話就話要加強樹木管理，仲煞有介事成立樹木辦添，可惜咁多年嚟毫無寸進不特止，仲鬧出「護樹變殺樹」嘅笑話，問你服未！
係咁嘅，本報視察部分近期修剪樹木嘅路段同公園，發現多個負責部門根本係亂剪一通。好似喺城門隧道公路往荃灣方向入口咁吖，由於有市民投訴樹木生長情況阻礙駕駛，於是咯喎，剪樹工人大剪一揮，大樹剩番一小截樹幹。北角英皇道遊樂場情況亦唔好得幾多，唔少經修剪嘅樹木切口出現扯斷樹皮、殘留枯枝等問題，其中一個切口附近更有一條長約一米嘅殘枝吊吊揈，隨時傷及途人，都咪話唔牙煙。
修剪樹木不得其法，後果真係可大可小o架。正如有專家話齋，修剪樹木本來係為咗減少枝幹造成危險或不便，如果斬去大部分枝幹，樹木就會留下大面積傷口，有機會整棵死亡。相反，如果棵樹夠命硬嘅話，剪咗之後反而可能令枝葉以二十到三十倍嘅速度生長，阻礙駕駛人士視線之餘，打風落雨吹跌枝葉，分分鐘釀成意外o架。即係話，一係樹死，一係人死，呢啲咪叫官不殺伯仁，伯仁因官而死囉。
俗語話，經一事，長一智。赤柱塌樹意外之後，港府係威係勢成立樹木辦，仲由時任政務司司長嘅唐唐掛帥統籌添，弊在有姿勢冇實際，樹木管理照舊係甩漏多多，烏龍百出。呢，當局十年前推出《古樹名木冊》，實牙實齒話要保護古樹嘅，結果十年後嘅今日，古樹名木死嘅死病嘅病，直頭笑大人個口。唔怪得塌樹傷人嘅意外近年仍然無日無之啦。正如立法會議員話齋，當局未有吸取教訓，各個管理樹木嘅政府部門各自為政，唔爆大鑊至奇啦。
冇錯嘞，一個和尚挑水喝，三個和尚無水喝。係人都知，互相扯皮、互相卸責，早已係本港官場嘅痼疾，樹木管理亂象叢生只係縮影嘅咋。唔係咩，打擊店舖阻街、取締僭建、檢查危樓，有邊樣唔係愈多部門管，愈冇人負責？當簡單到連違規晾衫問題都要勞動政務司司長出手處理，證明港產官僚根本就係廢柴，仲有咩好講吖。
正所謂，一滴水睇穿整個世界，一棵樹何嘗唔可以睇穿整個官場吖。港產官僚大事做唔到，小事做唔好，搞到樹木變都市炸彈，睇嚟大家都係自求多福，自備頭盔好過咯。