政情：陳家強放大假 預咗冇手尾跟？
立法會審議緊雙倍印花稅（DSD）法案，過唔過到都仲係未知之數，但憲報公布，負責處理法案嘅財經事務及庫務局局長陳家強由下星期三起就會放假十日，唔通佢真係坐定粒六，星期二最後一日大會可以通過，唔會有手尾跟？原來陳家強今年初榮升老爺，大仔陳漢唐（David）新婚後，因為工作關係移居紐約，所以陳家強幾個星期前就決定咗同老婆飛去紐約探親，但冇諗到時間夾得啱啱好。
梁繼昌飛芬蘭
講起會期接近完結，唔少議員都排住隊抖暑，但估唔到最快走嗰個竟然係會計界議員梁繼昌（Kenneth），今日凌晨就飛走，乜佢唔係要提豁免三年自用工商舖嘅修正案咩？Kenneth話，佢呢次去芬蘭，全因出席公司商務會議，最快都要一個星期後先返港。
咁佢個修正案點算？Kenneth原來已經搵咗公共專業聯盟自己友莫乃光代佢提修正案。Kenneth坦言，依家功能界別夠票通過，所以佢嗰一票未必太重要，反而地區直選仲差幾票，所以游說緊幾個小型泛民政黨支持。