政情：伏明霞帶仔女狂掃文具
暑假就嚟到，小朋友開心晒，但就辛苦家長抽時間陪子女，又要安排各種暑期活動。尋日我哋就見到前財政司司長梁錦松太太伏明霞（小伏）現身中環太子大廈一個商場，同行仲有一對子女。小伏先帶小朋友入去一間水晶店，見佢仔細端詳水晶杯，但係小朋友似乎冇乜興趣。可能小伏驚悶親對子女，所以只係逗留咗一陣，就拿拿聲轉戰附近一間文具店。
戰利品一大袋
兩位小朋友去到文具店，果然生猛晒，表現好開心。三人喺店內仔細揀選一輪，好快已拎住一大袋戰利品離去。當佢哋行出來時，小伏發現我哋行蹤，即時本能反應叫小朋友背對鏡頭，似乎有意用身軀遮擋佢哋咁。雖然呢個動作好正常，但小伏同阿松經常帶三位子女出席公開活動，又大方畀傳媒影全家福，三位子女嘅容貌早已廣為人識，唔知點解呢個時候又咁驚青呢？