政情：星爺出賣建制?
如無意外，立法會財務委員會（財委會）今日召開本年度最後一次會議，而主席吳亮星（星爺）嘅主席生涯亦係最後一日。不過，星爺臨落莊都惹來爭議，據聞有人喺前廳見到星爺同飯盒會召集人馮檢基（阿基）傾到攬頭攬頸，星爺之後又公開向傳媒透露，會向政府反映泛民主派提出調動議程嘅建議，搞到建制派中人以為星爺同泛民打龍通。其後證實星爺冇咁做，事件反映建制派對星爺嘅信任度已近乎零。
泛民全體議員前日發表聯署聲明，要求政府考慮調動議程，將與民生有關嘅撥款申請放喺較前位置優先審議，避免因為開會時間不足而未能通過所有福利項目撥款。不過，泛民開記招唔夠半個鐘，建制派就高調開記者會反對泛民建議，表明佢哋唔支持政府調動議程，費事開壞先例，搞到以後所有具爭議性嘅撥款申請都押到最後，變相唔使審議。據聞建制派咁高調表明立場，就係懷疑星爺出賣建制派幫泛民。
調動議程 「冇作任何承諾」
不過，阿基證實星爺當日根本就冇作出任何承諾，只係話會如實向政府反映泛民嘅意見，所以建制派有呢個「美麗的誤會」，完全係因為同星爺溝通不足所致，甚至對星爺失去信心。如果建制派真係咁諗，確實有啲多餘同過慮，事關星爺做事唔係要向建制派交代，如果星爺咁大膽臨尾「玩鋪勁」，相信佢都要向其他方面有所交代。
另外，財委會尋日討論撥款十五億元畀環境局興建廚餘回收中心，但人民力量陳偉業提出中止待續議案，星爺及後按程序要求大家先舉手表決，人民力量、民主黨和工聯會舉手支持，工黨、公共專業聯盟及謝偉銓反對，民建聯幾個成員就坐喺度冇投票，令議案以七票對五票獲得通過。星爺見到咁嘅投票結果，都嚇咗一跳，以為自己睇錯，「彈弓手」叫人舉多次手確認投票，但結果依然無變。
不過，審議呢項撥款存在風險早有先兆，平日好少見嘅環境局政治助理區詠芷尋日下午突然現身立法會走廊，仲周圍叫議員投贊成票，可惜最後連投票都慳番。