中環出更：名人論世盃德國躉醒神
萬眾矚目嘅巴西世界盃決戰在即，「大力神杯」將由德國捧走，還是落入阿根廷手上，掀起城中熱話，保良局董事會成員都妙論戰況。保良尋日舉行一年一度關帝寶誕祭祀禮，一眾成員及多位前主席誠心上香，又切燒豬祈求香港太平。拜完神後，燒豬即切即吃，前主席鄭錦鐘（Eric）就拉埋同樣愛好睇波嘅總理陳正欣（Daniel），一邊歎熱辣辣燒肉，一邊講波經。
鄭錦鐘：德有團隊精神
德國隊今屆表現技驚四座，Eric讚賞該隊有團隊精神，組織力強，恍如一支軍隊向前進攻，無堅不摧。相反巴西隊只着重個人技術，欠缺「冠軍相」，所以最終投德國一票。Daniel都話有同感，所以對巴西落敗不感訝異，只係唔明一支南美勁旅點解可以輸得咁離譜。講到通宵睇波，Daniel話平時習慣夜瞓，通頂無難度，加上佢啲歐洲客人都係球迷，大家協議趁開波前快手傾完生意，效率反而高咗。
近日有球迷買到假嘅世界盃門券，捐失數萬元。Eric同Daniel都話未聽聞有人兜售決賽門券，Daniel笑言有飛都唔會去睇，事關巴西治安麻麻哋。Eric就話團費要成十幾萬元，不如買紅酒飲吓好過。
呂鈞堯：無精神晚晚睇
前主席呂鈞堯（Quincy）都貼德國必勝：「我捧呢隊十幾年啦！」不過，Quincy每朝要六點起身湊仔女，無精神晚晚睇波。Quincy大仔Nathan八月將入讀幼稚園一年級，佢揀咗間以普通話及英語為主嘅學校，自嘲因為曾留學外國，「煲冬瓜」好水皮，期望兒子學好國語，做佢老師喎。
卓妮