「等，寂寞到夜深，夜已漸荒涼，夜已漸昏暗……」呢首經典金曲，用嚟形容市民輪候公屋嘅心情，貼切不過。
呢，政府成日話申請公屋平均三年可以上樓，點知原來係大隻講。有團體踢爆，唔少四至六人家庭閒閒地要七年至輪到公屋，而家陣本港有大約十二萬非長者一人申請個案，每年分配畀佢哋嘅單位只有二千個咁大把，等得嚟蚊到瞓蛇都死喇。有住喺劏房嘅患癌長者擔心等到上樓都「冇命住」，亦有人輪候五年上唔到樓，諗過輕生以博取家人獲恩恤安置，真係聽見都心酸。
話時話，公屋三年上樓承諾「彈票」，早就唔係乜嘢新聞。審計署早前發表報告，狠批房屋署喺公屋輪候時間上「篤數」，例如將輪候時間較短嘅單身長者，計入一般家庭申請，搞到一般家庭嘅平均輪候時間縮減至三年以內。仲有吖，房署既冇嚴打申請人虛報漏報資料，又冇收緊富戶同寬敞戶政策，令公屋流轉進一步減慢，申請者有乜法子唔等到頸都長吖。
即係咁，前朝貪曾政府坐視房屋問題愈演愈烈，現屆政府聲稱會對症下藥，將解決房屋問題列為施政重中之重，可惜講就天下無敵，做就有心無力。雖然喺拓地建屋方面扭盡六壬，但無論係打郊野公園主意，抑或填海造地，統統畫餅充饑，最巴閉都只不過係見縫插針起牙籤樓，對增加供應嚟講，連杯水車薪都不如。所以話啫，政府靠得住，豬乸會上樹，真係冇講錯。
不過話又講番轉頭，房屋問題尾大不掉，政府無能固然難辭其咎，而社會泛政治化，事無大小乜都拗餐懵，成日家嘈屋閉，正經嘢又點做得成吖。好似新界東北發展計劃咁，原本係民生問題，但被扭曲成政治問題，單係前期工程撥款都搞到好似打仗咁，之後過城規會同徵地拆遷，爭議只會愈來愈激烈，最終會唔會又係跪低收場，只有天曉得。
一葉知秋，房屋政策一籌莫展，只係港府施政寸步難行嘅縮影咋。大家有眼見，由「三堆一爐」，到大嶼山發展，再到機場第三條跑道，都係講咗N年，到依家仲係無米粥。再咁落去，香港唔止落後上海、深圳等競爭對手，隨時淪落為第三世界都似。
回歸短短十七年，香港已經由經濟城市變成政治城市，點會有運行吖。港大最近民調顯示，市民對政治問題嘅關注度首次超越經濟問題，無疑係一個警號。禍福無門，惟人自招，要發展定要內耗，要建設定要沉淪，大家係時候作出抉擇喇。