政情：鄭錦鐘瘦身 堅守「食半份」
潮流興練大隻、谷胸肌，但唔係後生仔專利，好似保良局前主席鄭錦鐘（Eric）咁，除咗要減磅外，仲秘密操胸肌，平日會在中環私人健身室，約埋私人教練上堂，相當認真。要瘦當然要付出代價啦，Eric話，最緊要忍得口，佢近日奉行「食半份」嘅戒條，每樣食物只食半份，又戒吃甜點，半年間瘦咗幾磅。
講到健身，Eric話呢個習慣維持咗十幾年，每星期練個半鐘，風雨不改。
聘教練操肌有成績
去年做保良局主席後忙到飛起，被迫破例偷懶。點知因為郁動少，加上應酬多，一年間肥咗幾磅，所以卸任後決心減磅，近日急Call私人教練上堂。佢又拍拍胸肌，露出滿意笑容話：「以前身形好瘦冇乜肌肉，苦練一輪後終於有成績。」不過，如果要練到六舊腹肌，佢就話咪搞嘞。