政情：官員遊台過四關
話咁快就到暑假，唔少學生哥，以至打工仔個心已經去咗旅行，亦相信身處「熱廚房」嘅政治問責官員都好想訂機票去度假。台灣係港人熱門旅遊地點之一，一般市民只要用十幾分鐘上網申請入台證就得，但我哋聽聞，原來問責官員、甚至以官式身份去過台灣嘅常任秘書長等官員，都被台灣列入「黑名單」，想放假去台灣三兩日都搞到一波三折，事關申請入台證關卡重重。
問責官不可網上申台證
據理解，問責官員如果休假去海外旅行，政府會當作私人事項，唔使經過特別審批，只要知會上司就可以。不過，如果旅遊地點係台灣就例外，由於香港問責官員唔可以上網申請入台證，去到台灣申請落地簽證更試過被拒入境，傳聞有人試過因此差少少去唔成旅行，情況搞到好尷尬。
因應上述情況，所以今屆政府開始將赴台申請常規化，如果官員想以私人理由去台灣旅遊，既要通知所屬政策局局長，負責港台關係嘅政制及內地事務局亦特別預備咗張表格，由該局幫手申請入台證，同時亦要知會特首辦公室，可以稱得上係「過五關斬六將」。
填表審批 再知會特首辦
據知欲赴台旅遊嘅官員，要喺申請表格填上個人姓名、職級、去台灣嘅時間、目的地等，如果行程期間有機會同當地官員會面，就要預先寫低，跟住政制及內地事務局就會決定係咪同意有關申請，然後再交由特首簽署作實。之後申請入台證嘅官員就要帶齊相關文件，親自去金鐘嘅台北經濟文化辦事處申請入台證，快則十日搞掂，慢則三星期至一個月都未定。
赴台申請表格又講明，如果官員遊台期間，有駐港台灣機構或台灣當局主動聯絡或接觸佢哋，返港後就要作出匯報，同時又提醒赴台官員，記得自己係以私人身份去台灣旅遊，除非獲得授權，否則言行唔代表特區政府。不過，台灣離香港咁近，只係一個多小時機程，所以好多官員都似乎唔怕麻煩，照去可也！