中環出更：學生尖銳問題 考起維安？
「第七屆香港模擬立法會」首個工作坊喺剛過去嘅周日於立法會大樓教育活動室舉行，立法會秘書長陳維安（Kenneth）分兩次親自接待百多名高中同學，據聞同學們嘅問題好尖銳，而且貼近社會熱門議題，包括功能界別存廢、分組點票、立會保安安排等。之後Kenneth於社交網站留言話，佢無提供標準答案，莫非被同學仔問到口啞啞？
身為模擬立法會活動創辦人、青年事務委員會委員范凱傑，當日有份參加該工作坊，佢話Kenneth無被同學仔問到口啞啞，只係以持平角度答提問，例如有同學問到最近有委員會主席主持會議時被指違反議事規則，會有何制衡機制？
稱鼓勵分析多探索
據引述，Kenneth當時話每個主席主持會議風格不同，強調秘書處同法律顧問有需要時會作出提點，至於係咪經得起法律挑戰就非秘書處能夠講嘞。當問及功能界別問題時，Kenneth先談及功能界別嘅歷史由來，但並無提及其存廢問題。Kenneth話，其實佢係想鼓勵同學多探索、多思考，從唔同角度分析事情喎。
卓妮