中環出更：廠商會盃賽 會董中單T
馬季臨近煞科，沙田馬場盃賽特別多，中華廠商聯合會（廠商會）就揀咗尋日七一舉行八十周年紀念盃賽，而且仲有馬匹出賽添，一班會董及青委成員齊齊捧場打氣，有成員仲落注支持，好似會董羅台秦（Louisa）就中咗一條單Ｔ，獎金唔多但勝在夠開心。一班活力十足嘅年輕成員亦有新搞作，嚟緊會參加慈善越野馬拉松，八個小時內行二十六公里，少啲體力都唔掂。
廠商會今年八十大壽喜事多籮籮，Louisa同青委名譽主席周雯玲（Irene）時來運到，雙雙贏錢。Louisa為捧場支持廠商會馬匹，落注中咗幾百元單Ｔ。Irene就買中德國世盃十六強賽事零比零，佢身為德國球迷，話一開賽睇到場波個局勢先落注，咁有眼光抵佢贏波又贏錢。
一班紮紮跳嘅成員諗慶祝活動時，亦不忘行善。常務會董李慧芬透露，佢哋十一月將會參加苗圃行動嘅二十六公里慈善越野馬拉松，目前已知有青委副主席王詩雅、顏明秀等約二十個成員，共分成六組參加。佢哋仲有個委員胡子岐係「魔鬼教練」，負責鞭策佢哋練習，而青委副主席劉子芸，雖然有腳舊患參加唔到，但仍會負責補給支援。
雖然同場一班前輩體力未必咁旺盛，但對世界盃一樣狂熱，仲開咗個WhatsApp群組「吹波台」，競猜決賽對疊隊伍。
莊偉茵貼世盃「南美之爭」
中電企業發展總裁莊偉茵（Quince）及老公黃楚權亦係該群組成員，佢哋同廠商會常務會董史立德一樣，估決賽兩隊都係南美國家。點知Quince被人寸佢「唔好傻」，話佢平日咁精明，估唔到今次聽晒老公講，對佢好失望喎。
卓妮