政情：譚志源笑政助被當「通緝犯」
立法會財務委員會早前審議新界東北計劃前期工程撥款期間爆發衝突，多位參與集會嘅人士相繼被警方拘捕同落案起訴，包括坪輋村村民張貴財、土地民化陣線梁穎禮及社民連黃浩銘等。不過，有人發現社運人士梁穎禮個樣貌同政制及內地事務局政治助理陳岳鵬（Ronald）好相似，就連陳嘅上司局長譚志源（Raymond）都問陳係咪做咗通緝犯喎。
與社運人士梁穎禮似樣
Ronald話，佢睇報紙嗰陣都嚇咗一跳，以為有人攞咗佢張相嚟惡搞，唔少朋友仲不斷打電話畀佢，問佢係咪被警察拉咗，搞到佢哭笑不得，猛咁澄清話被拉嗰個係梁穎禮。
Raymond尋日出席立法會會議後，仲主動講笑問在場傳媒知唔知Ronald變咗通緝犯，又話會好好睇住Ronald，唔會再比佢衝擊立法會。被問到Ronald明明被警察拉咗，點解仲可以喺立法會出現時，Raymond未出聲，Ronald已即時搶答話：「你唔知我已經保釋咗咩？」