政情：立會查高鐵 田二少怕坐正
高鐵超支風波，港鐵同政府分別成立調查委員會追查事件，尋日到立法會議員要求第三路追殺，提交呈請書要求成立專責委員會（專委會）調查誰是誰非。聽聞唔少建制派同政府官員，都想推舉新民黨副主席田北辰（田二少）擔任專委會主席，貪佢熟悉鐵路運作可以坐鎮大局。不過，據聞田二少擔心高鐵愈揭愈多衰嘢，加上泛民狙擊無休止，所以對於做主席或做委員，現時仍然心大心細未有決定。
今次專委會要徹查高鐵延誤及超支，相信係件浩瀚工程，唔單止要涉及專業技術知識，仲可能要涉及法律層面，睇怕有份調查嘅委員，只係睇文件都有排睇，如果計埋開會及撰寫報告，一、兩年時間真係走唔甩，令成個高鐵專委會分分鐘變成「翻版雷曼事件」，查足兩年都係無米粥。
主席冇得發炮
正係呢個原因，令唔少想加入專委會嘅議員卻步，恐怕花費太多時間，特別係建制派議員，萬一高鐵醜聞愈爆愈多，到時都唔知鬧唔鬧好。
不過，建制派同政府為免專委會主席之位由泛民議員操控，據聞有意「欽點」田二少幫手捱義氣做主席，但聽講田二少至今未肯應承。其實都唔難理解，因為無論邊個做主席都冇得向高鐵「發炮」，少咗曝光率就非常唔抵。如果田二少唔肯做，建制派內都仲有一、兩名大熱主席人選，包括本身係工務小組主席嘅工程界議員盧偉國，佢講到明有興趣加入專委會，如果有人認為佢適合做主席，佢都會願意出任喎。
廖長江考慮做
至於航運交通界議員易志明，都表明會加入專委會，但佢就話自己經驗尚淺，所以冇乜興趣做主席，認為呢啲職位應該留畀其他「有心人士」。不過，有建制派議員認為，調查高鐵好可能涉及複雜法律事宜，所以應該搵位有法律背景人士出任，所以本身係大律師嘅廖長江亦在名單之上。廖長江就好老實話，自己從來唔爭做乜做物，但假如有人認為佢適合出任主席，佢一定會認真考慮喎。