中環出更：跑車跪低 盧偉國開會遲到
身兼立法會工務小組委員會主席嘅工程界議員盧偉國（WK），喺尋日朝早委員會開會時遲大到，仲要由該委員會副主席梁志祥代為主持近半小時，莫非WK因為睇波唔知醒去開會咁離譜？原來WK遲到係因為佢架中古跑車喺駛往立法會途中「跪低」，即時要搵拖車公司，又要周圍打電話求救，幸好有路過嘅警察協助，加上佢細佬咁啱又喺附近，所以先有人載佢返立法會開會。
八八年出廠 「無車能及」
WK今次拋錨嗰架車，就係我哋以前提過嗰架八八年出廠嘅中古保時捷，但WK話自己作為機械工程師嘅角度嚟睇，呢架車嘅機件係無車能及，雖然仲係棍波再加冇風油軚，但佢嗰種Classic（古典）味道好難再喺依家啲新車搵到，所以一定唔會劏架車喎。WK仲話，架車平時都好「乖仔」，今次咁奀皮可能因為佢呢個幾月經常留喺立會，冇時間撻吓架車，佢希望盡快整番好架車，太太唔會詐型喎。
卓妮