政情：港鐵靜悄悄搞平頂儀式
港鐵近期是非纏身，由瞞報高鐵工程延誤，一直到幾條新鐵路線工程全面滯後，行政總裁韋達誠成為眾矢之的，更令企業形象大受打擊。唔知港鐵係咪大傷元氣兼怕咗傳媒，尋日南港島線（東段）嘅黃竹坑鐵路維修車廠平頂，竟然冇任何採訪安排，只係搞完晒儀式先通知傳媒，畀着以前無風無浪時，肯定大鑼大鼓宣傳。
冇採訪安排
港鐵最近頭頭碰着黑，唔係賴地硬就係賴地太軟阻住施工，難得全港首個專為全自動列車控制系統而設嘅車廠可以順順利利平到頂，本來應該大肆慶祝一番。不過，今次港鐵只係透過新聞稿公布呢個叫做好嘅消息，話黃竹坑車廠搞掂之後可以調配工程車裝架空電纜及軌旁線路，仲可以測試埋列車，但始終冇提幾時可以通車。韋達誠尋日仲同地區人士、民政官員揸住個鏟影大合照，睇佢笑得好高興。梗係啦，咁多醜聞纏身都冇阻佢將啲薪酬及花紅袋袋平安。