立法會財務委員會呢幾個星期審議新界東北規劃前期撥款，由場內審議到場外示威都非常之火爆，有唔少泛民主派議員助理被指「裏應外合」協助示威及衝擊。立法會主席曾鈺成上星期就不點名，指有議員助理逐層樓拍卡，據聞涉事嘅人係議員張國柱（阿柱）嘅助理，事發在上星期三。
阿柱就唔肯透露該名助理嘅身份，只係話佢冇社運背景，又講番由於上星期起，立法會限制議員助理進出唔同樓層嘅權限，當時佢助理只係想試吓各樓層用唔用到張卡啫。阿柱舉例話，佢助理上星期五連五樓開會嗰層都去唔到，事後已同秘書處反映，認為秘書處都會忙中有錯。
不過，有建制派議員就對此好有意見，覺得此舉雖然冇犯法，但助理冇拍卡嘅職責，質疑佢嘅企圖，係咪想測試大樓保安，以便帶人混入立法會大樓，希望佢解釋清楚。阿柱承認，近期係「非常時期」，故此提醒助理用呢種試卡方法唔係太好，下次應該問番秘書處喎。