政情：佔中七一與「民」爭利
民陣近年搞七一遊行，泛民政黨政團都把握機會「抽水」，爭逐籌措來年經費，當正參與遊行市民係「提款機」係咁。其中「佔領中環」（佔中）呢一兩年亦加入錢行列，皆因佢哋過去搞民調同公投都使咗三百幾萬元，七一前仲使凸欠債四五十萬元，講到明要靠七一遊行籌錢填氹。今年佔中搞到興合合，話唔定到時搶晒其他泛民黨派嘅捐款都未定，分分鐘又為籌款及上繳問題嗌交收場。
繼真普選聯盟搞到乾塘之後，依家又輪到佔中乾塘。
「希望籌到一百萬」
佔中發起人陳健民透露，今次公投畀咗港大民意研究計劃二百幾萬元，又用咗幾十萬元做文宣、橫額等，計計埋差不多使晒之前籌嘅錢，加上佢哋要出糧畀職員，估計七一前已經要孭債。不過，佢只係打算在灣仔港鐵站附近擺一個街站，買新版T恤同袋，加上佔中三子站台，聯同近百名義工，希望可以籌到一百多萬元填氹，達到收支平衡。
「唔想同人爭生意」
雖然陳健民話佔中只係擺一個街站，唔想同其他民間團體「爭生意」，但佢哋之前谷人投票谷得咁勁，七一遊行當日極有可能搶晒啲「生意」，仲未計近年崛起嘅學民思潮強勁吸水能力，預料其他政黨政團籌款將大受影響，加上計埋上繳畀民陣，真係所餘無幾。至於民陣就話，已同四十幾個民間團體協調，按傳統每個團體都會向民陣上繳一成籌款額。不過，以往有唔少團體因為不滿上繳而「走數」，所以民陣打唔打得響呢個如意算盤，似乎唔多樂觀。講開又講，民陣原定向警方申請七一遊行開始時間由三點改為四點鐘，以及要求開放軒尼詩道六條行車線，但遭警方反對，民陣尋日正式向公眾集會及遊行上訴委員會上訴，最快明日召開聆訊。民陣召集人楊政賢質疑，主辦單位有權選擇幾點出發，用番同一邏輯，警方隨時可以話七一當日唔合適，咁咪要改日子搞遊行？不過，民陣年年都爭取開放多幾條行車線，但相信最終都不獲警方接納。