中環出更：填海爭拗 「兩舊雲」鬥悲情
立法會工務小組委員會尋日開會討論中部水域人工島策略性研究工程項目，但依家面對泛民主派全線會議「拉布」，令小小工程都議而不決。支持政府填海解決房屋問題嘅建制派議員蔣麗芸（Ann），就憶述自己落區探訪劏房戶時感觸落淚嘅經歷，但泛民議員黃碧雲（一舊雲）就緊張中華白海豚多過人類嘅住屋問題。兩舊雲會上互鬥悲情，直到會議完結搭升降機走都仲拗唔停。
阿Ann喺會上話，九龍西係劏房重災區，佢經常都去視察劏房戶︰「有次試過行入去，我『嘩』一聲喊咗出嚟，真係要發展房屋。」仲話人工島呢個項目發展事務委員會已傾過，希望唔好再「拉布」咁話。
不過，「一舊雲」就冇為阿Ann嘅眼淚動容，因為佢心繫中華白海豚，仲話政府將陸續有好多填海工程，「海洋係抵受唔到粗暴蹂躪，海豚係唔識呼喊、唔識嗌救命o架，但啲屍體就會浮晒上嚟。」「一舊雲」仲反駁阿Ann，話就算起人工島，政府又話要搞東大嶼都會，到時都未必係用嚟安置劏房戶喎。
卓妮