紅磡：港鐵出口通風差似蒸籠
「次次行過都好似入咗蒸籠咁，焗到連抖啖氣都難！」家住紅磡的張先生指出，港鐵紅磡站B出口通道多年來一直通風欠佳，去年經本報反映後，獲港鐵承諾增加風扇及改善通風系統，惟近日再次行經上址，發現翳焗情況依舊，「係咪要每年夏天都要同《東方》投訴一次，港鐵先肯做嘢？」
稱已加設風扇及涼風機
港鐵發言人表示，涉事行人通道採天然通風設計，目前已加設風扇、抽氣扇及於部分位置設有涼風機，有需要時職員亦會打開窗戶，以保持空氣流通。發言人承諾將繼續留意有關情況，並定期派員清潔及檢查通風設施。
張先生直斥港鐵每年賺取巨額盈利，卻未有因應市民需要作出改善，做法令人失望。「成日都承諾呢樣、承諾嗰樣，真係要做到至好！如果有人中暑，係咪港鐵負責先？」