擅入屋代清理 鄰居隨時惹官非
毗鄰單位淪為「垃圾屋」固然不勝其擾，即使戶主已搬離垃圾屋，鄰居仍不能擅自入屋清理，否則隨時惹上官非。涉事大廈業主立案法團主席蔡先生坦言，由於「垃圾屋」嚴重威脅整幢大廈衞生，加上涉事單位業權不清，一度計劃聘請清潔公司自行解決，「業主一早就死咗，執垃圾返嚟嗰個伯伯又畀社署接走咗，所以都有諗過自己搵人執走啲垃圾，但又驚係私人財產，咁做會犯法。」
恐犯兩宗罪
律師梁永鏗指出，市民或法團如擅自進入「垃圾屋」清理垃圾，或會干犯擅闖私人地方及盜竊兩宗罪行，「就算垃圾唔值錢都好，你都唔可以拎走人啲嘢，如果業主已經死咗而冇人繼承，個單位可能會畀番政府，市民亦都唔可以亂咁入去清垃圾。」
梁表示，市民倘遇相關情況，應尋求食環署協助，或援引大廈公契，以及早解決問題，「一般嚟講，管理公司或者法團可以援引大廈公契有關公共衞生嘅規定，向法庭申請禁制令，要求業主清理垃圾。」