話說有個細路畀彪形大漢狂揼，雖然佢無還手之力，但出於本能都會嗌痛兼 say no，點知居然有人「勸」個細路出少句聲，打就企定，你話係咪吹脹。
嗱，喺現實生活中，市民就係被揼嘅細路，而郁手嘅大舊衰就係港鐵嘞。港鐵今個星期日起平均加價三點六個巴仙，惹來怨聲四起，立法會交通事務委員會尋日通過無約束力嘅反對動議。話明冇約束力，即係港鐵根本毋須理會，一於照加可也。喺呢個時候發生一段小插曲，有人以議員要求港鐵擴大優惠，等於同意加價為由，一度拒絕處理反對動議。嘩，畀人住搶喎，連抗議都唔准，有冇再離譜啲呀。
話時話，港鐵年年賺大錢年年加價，已經係例行公事，市民肉隨砧板上，條氣已經好唔順啦，更何況港鐵管理混亂，服務倒退，咁都仲要獅子開大口，唔畀人炳到七彩至奇。唔係咩，港鐵列車故障如家常便飯，由港鐵負責嘅高鐵工程又超支又延誤，管理層更夾埋港府講大話呃人，簡直鑊鑊新鮮鑊鑊甘。老實講吖，以佢哋今時今日咁嘅服務質素，就算唔減票價，管理層都應該扣薪謝罪啦吓話？
唔知係咪自己知衰，定係眾怒難犯，港鐵宣布今年擴大乘車優惠，仲話「都會票」推出兩星期已售出近五萬張，連同其他優惠，受惠乘客超過六成喎。喂，港鐵講大話好似食生菜咁，誠信早就破產，家陣將優惠吹到天花龍鳳，細蚊仔都唔信喇。講真呢啲所謂優惠，限制多多，姿勢大於實際，以「都會票」為例，一個月最多搭四十程，根本唔夠一星期返五日工嘅市民來回，港鐵若真心謝罪，實牙實齒減價好過啦。
仲有吖，公共交通加價呢味嘢有傳染性，港鐵帶衰個頭吖嘛，九巴下月開始都會調整票價，據聞市區的士亦研究緊申請加價，跟住可能輪到電費等，你加我加個個加，打工仔百上加斤，唔嬲就假。
有人話，「可加可減」票價調整機制運行多年，已經淪為「有加冇減」，應該盡快檢討。查實當局早前已經對機制進行過微調，加入包括市民負擔能力、家庭入息中位數以及事故罰款回饋乘客等考慮因素，結果係點，咪一樣要加價，可見小修小補根本無濟於事。
計功夫茶話齋，港鐵欲壑難填，想加價就加，都係因為身為港鐵大股東嘅港府冇心冇肺，助紂為虐，一句「在商言商」就想推卸責任！事實上，好多國家同地區都對公交實行財政補貼，減輕市民負擔。港產官僚唔係好鍾意「參考外國先進經驗」嘅咩，仲唔快啲學嘢！